Postairean PE - briathrachas agus gnìomhan PE airson na bun-sgoile  (Bun-sgoil)

Marion Steele (Diciadain a-mhàin)

Anns a’ bhùth-obrach seo fhuair tidsearan bun-sgoile a dh’fheumas PE a theagasg an cothrom eòlas a chur air gnìomhan PE a ghabhas dèanamh sa chlasrum no san raon-chluiche.

Tro bhith a’ cur eòlas air na gnìomhan chuir iad eòlas cuideachd air a’ bhriathrachas a bu choìr dhaibh cleachdadh.

Sgeama Litreachaidh Fòneataig (Bun-sgoil 1-3)

Màiri NicDhòmhnaill, Gwen Culbertson (Diciadain a-mhàin)

Choimhead a’ bhùth-obrach seo air sgeama litreachaidh fòneataig a chaidh a leasachadh le tidsearan ann an Roinn na Gàidhealtachd.

Chuala riochdairean mar a chaidh an sgeama a chruthachadh agus bha cothrom aca na gnìomhan litreachaidh fheuchainn iad fhèin.

Cuideachd, thàinig riochdairean còmhla ann am buidhnean gus goireasan litreachaidh eile, as urrainn dhaibh cur gu feum nan clasrum fhèin, a leasachadh agus a roinn.

Leabhraichean Mòra - eisimpleir de dheagh chleachdadh (Bun-sgoil)

Catrìona Chaimbeul (Feasgar Diciadain & Diardaoin x 2)

Thèid trì tiotalan ùra chun nan sgoiltean am-bliadhna: Goldilocks agus na Trì Mathain, Na Trì Gobhair Ghruamach agus Na Trì Mucan Beaga.

A’ cleachdadh thiotalan a tha ann mu thràth agus eisimpleirean bhon fheadhainn ùra, chuala riochdairean mar a fhuair aon tidsear air adhart a’ cleachdadh nan leabhraichean goireasach seo. Cuiridh iad taic ri teagasg chuspairean agus tha eisimpleirean annta airson a bhith a’ cruthachadh stuthan còmhla ris a’ chlas.

An cois cuid de na tiotalan tha leabhraichean-d a ghabhas cleachdadh air bòrd-geal eadar-ghnìomhail; faodaidh clann am mac-meanmna a chleachdadh gus innse do dhaoine eile mar a bu chòir an sgeulachd crìochnachadh, nam beachd-san!

Taic do chlann le feumalachdan taic a bharrachd  (Bun-sgoil)

Eàirdsidh MacLullich, Fiona Lyons (Diciadain & Diardaoin)

Choimhead Eàirdsidh MacLullich ri cùisean co-cheangailte ri measadh cloinne agus trèanadh luchd-obrach ann am Foghlam tro Mheadhan na Gàidhlig, a’ togail air pròiseact rannsachaidh a rinn e o chionn ghoirid do Bhòrd na Gàidhlig.

Cuideachd, sheall e dòighean a tha ag amas an-dràsta air a bhith a’ leasachadh ghoireasan taic do chlann le feumalachdan taic a bharrachd, bho shealladh saidhceòlach.

Thug Fiona Lyons sùil air na cùisean sin bho shealladh an tidseir.

Meadhanan ùra sa chlas (Bun-sgoil)

Hamish Budge (Feasgar Diciadain & Madainn Diardaoin)

Bha cothrom aig riochdairean ionnsachadh mu phrògraman mheadhanan sìmplidh as urrainn dhaibh cleachdadh nan clasrum fhèin.

Dh’ionnsaich iad cuideachd mar a chuireas iad iad gu feum gus pasgan mheadhanan sìmplidh a dhèanamh a chleachdas iad mar phàirt de chuspair no de phròiseact.

Chaidh sealltainn do riochdairean na dòighean a dh’fheumas iad airson teacsa agus ìomhaighean a chlàradh, a dheasachadh agus a luchdachadh suas gu PC no gu innealan so-ghiùlain.

Tha na prògraman a chaidh a chleachdadh an-asgaidh agus ri fhaotainn air-loidhne far am faigh a h-uile tidsear thuca.

Chaidh prògraman eile a tha ri fhaotainn agus goireasan air-loidhne eile a tha an-asgaidh a shealltainn dhaibh airson fiosrachadh.

Frèam Cànain airson Gàidhlig (Bun-sgoil)

D I MacLeòid, Shona NicCarmaig (Madainn Diciadain & Madainn Diardaoin)

Sa bhùth-obrach seo thuirt D I MacLeòid facal goirid mu carson a tha feum air ‘frèam cànain’ agus sheall e mar a tha obair cànain a’ ceangal a-steach ri CfE agus ri goireas leithid Mìrean.

An uair sin, ann am buidhnean, dh’obraich riochdairean air dreachd den fhrèam seo, a tha a’ ruith bhon Ìre Thràth gu Ìre 3, ag atharrachadh rudan no a’ cur ris, gu h-àraidh a thaobh dòighean-teagaisg agus nan stuthan a tha a dhìth.

Chuir Shona NicCarmaig ris a' bhùth-obrach bho shealladh an tidseir sa chlasrum.

Nobhailean - A’ brosnachadh sgrìobhadh cruthachail  (Bun-sgoil)

Chrisella Ros, Màiri E Milne (Feasgar Diciadain & Feasgar Diardaoin)

Thug a’ bhùth-obrach seo sùil air na ceumannan riatanach ann a bhith a’ sgrìobhadh sgeulachd chruthachail agus air carson a bhios tidsearan a’ cleachdadh sgrìobhadh sgeulachd chruthachail.

Tha Chrissella agus Màiri le chèile nan ùghdaran.

Thug iad eisimpleirean seachad air stoidhlichean sgrìobhadh cruthachail a tha freagarrach airson clann bun-sgoile, agus sheall iad mar as urrainn do chlann nas òige dealbhan a chleachdadh gus sgeulachd a chruthachadh, agus gus ionnsachadh mar a chruthaicheas agus a leasaicheas iad caractar.

Bha còmhradh ann mu na dòighean sam bi sgrìobhadh cruthachail a’ cuideachadh gus sgilean cànain, gràmar, litearrachd, litreachadh agus cleachdadh ghnàthasan-cainnt a leasachadh.

Ciste nan Lochlannach  (Bun-sgoil 4-7)

Amy Cruickshank (Diardaoin a-mhàin)

Sheall a’ bhùth-obrach seo mar a chleachd aon tidsear an goireas seo na sgoil fhèin.

Fhuair riochdairean fiosrachadh mu gach nì sa chiste agus mar a ghabhas a chleachdadh airson obair cuspair agus obair pròiseict.

Cuideachd, bha cothrom aig riochdairean stuthan a chruthachadh iad fhèin a chleachdas iad nan clasrum fhèin.

Bliadhna an Nàdair an Alba 2013 (Bun-sgoil)

Emily Edwards agus Mòrag Dhòmhnallach (Diardaoin a-mhàin)

Bidh Dualchas Nàdair na h-Alba (SNH) a’ coimhead às dèidh fiadh-bheatha, àrainnean, cruth-tìre agus bòidhchead nàdarrach na h-Alba agus a’ brosnachadh dhaoine gus tlachd a ghabhail agus luach a chur annta.

Mar phàirt de Bhliadhna an Nàdair an Alba, stiùir Emily Edwards, oifigear Gàidhlig SNH, a’ chiad phàirt dhen t-seisean seo a choimhead ri goireasan Gàidhlig SNH airson sgoiltean, agus a ghabh a-steach na tiotalan ùra National Geographic aig Stòrlann, Beathaichean nan Àrainn Fhèin.

Chaidh an dàrna pàirt a stiùireadh leis an neach-ealain Mòrag Dhòmhnallach, agus ’s e seisean practaigeach a bha ann. Dh’obraich Mòrag còmhla ri SNH air an taisbeanadh Air Iomlaid agus on uair sin air a’ phròiseact Rannsaich, a thug clann a-mach gu pàircean, coilltean agus tèarmainn gus nàdar a rannsachadh tro ealain.

Bhruidhinn Mòrag air dòighean sìmplidh agus bha comhairle aice airson a bhith a’ toirt sgoilearan a-mach agus a’ dol an sàs ann an nàdar agus ealain ann an dòigh spòrsail, phractaigeach. Fhuair compàirtichean san t-seisean pasgan CPD.