Bidh
Mìneachadh
Tha bidh air a chleachdadh an àite tha airson innse mu rud a tha a’ tachairt tric no an-còmhnaidh aig an àm seo. Seo na riochdan sam faighear e:
- bidh/bithidh, am bi, cha bhi, a bhios/bhitheas
[’S e bidh as cumanta na bithidh. Mar as trice, chan eil bithidh air a chleachdadh ach leis fhèin mar fhreagairt ceist: Am bi iad an sin a h-uile latha? Bithidh. Tha bhios nas cumanta na bhitheas.]
Tha bidh air a chleachdadh nuair a tha e leis fhèin aig toiseach seantans (no clàs):
- Bidh iadsan a’ falbh agus bidh sinne a’ tighinn aig uair a h-uile latha.
Tha bi air a chleachdadh airson faighneachd am bi rud ann no nach bi:
- Am bi thu a’ dol an sin tric?
- Nach bi thu a’ leantainn ball-coise?
Tha bi air a chleachdadh cuideachd ann an suidhichidhean mar:
- Sin far am bi am bus a’ stad.
- Càit am bi thu a’ dol às deidh na sgoile gach latha?
- Thuirt e gum bi iad a’ dol ann tric.
Tha bhi air a chleachdadh airson a ràdh nach bi rud a’ tachairt:
- Cha bhi mi a’ coimhead ball-coise uair sam bith.
Tha bhios air a chleachdadh às dèidh
- cò/dè/cuin a/carson a/ciamar a? (no an leithid)
- ma, ged a, mar a, nuair a, fhad ’s a, on a, a (no an leithid)
Mar eisimpleir:
- Cuin a bhios am bus an seo gach latha?
- Sin am fear a bhios a’ glanadh na sgoile.
[Tha tu air a chleachdadh an àite thu às dèidh bhios: Carson a bhios tu a’ ràdh sin?]
Tha am pàtran seo air a chleachdadh le faclan gnìomh mar can no tachair cuideachd:
- ’S e sin a chanas iad.
- Tachraidh rudan mar sin uaireannan.
